- 相關推薦
看粵語劇本唐伯虎點秋香學粵語
導語：《唐伯虎點秋香》是一部喜劇電影，由周星馳、李力持執導，周星馳、鞏俐、鄭佩佩等主演。該片講述了江南才子唐伯虎對華太師府上的丫鬟秋香一見鐘情，在船夫的幫助下他施展計謀混進了華府。下面YJBYS小編分享唐伯虎點秋香的粵語劇本，歡迎參考!
(唐府門前，好多人喺度等緊)
茄咧啡甲：哎～，點解呢嚇?我等咗三個時辰喇，都未出嚟嘅?
茄咧啡乙：系啰，平時兩個時辰到就會出嚟個噃。
(唐府下人出門倒垃圾)
仆人甲：啲垃圾放喺門口。
眾仆人：哦!
眾人(原來喺度等緊垃圾，都上去搶)：哎呀，搶呀搶呀!
茄咧啡甲：哈哈!哎呀，我終于揾到唐伯虎嘅墨寶喇!
眾人(齊追茄咧啡甲)：我見到先架!畀返我呀!……
(唐伯虎手執毛筆，好似寫字噉嘅款，原來系用豉油搽雞翼)
仆人甲：一碟豉油夠唔夠“jaam5”，少爺?
唐伯虎：慢慢嚟!
仆人甲：少爺呀，出便好多人求畫，真系唔理佢哋呀?
唐伯虎：今日我冇乜心情畫畫，同我醒多兩籮垃圾佢哋算啦。
仆人甲：系，少爺!
仆人甲：(出門時在門中碰見祝枝山)祝公子。
祝枝山：哎，唐兄!
唐伯虎：哎，祝兄!
祝枝山：唐兄，救命呀。
唐伯虎：唉，睇嚟祝兄梗系輸錢輸到干干凈凈定嘞。
祝枝山：哈，生我者父母，知我者唐兄呀!
唐伯虎：江南四大才子之中，就以祝兄你最為灑脫，眾人皆知!所謂風吹雞蛋殼，財散人安樂，乃系祝兄你嘅座右銘呀。
祝枝山：過獎過獎，但比唐兄嘅風流不羈，小弟真系有如天淵之別呀!
唐伯虎：哈哈哈哈，之不過，祝兄你隔夜一百幾呀兩噉輸，輸完走嚟嗌救命，長此以往，唔系辦法噃。
祝枝山：哎，有見地，小弟有見及此,所以破斧沉舟，一次過輸曬我一世人可以輸嘅錢，整整系三十萬兩，所以麻煩唐兄畫返三十幅畫，以嚟填債救命!
唐伯虎：明白明白。阿水，你出出去先!
仆人阿水：系，少爺!
唐伯虎(等阿水出去之后)：仆你個臭街，當呢度善堂呀?重要畫卅幅?冇得傾!
祝枝山：哎呀，唔好噉啊，系我衰啊，系我衰喇。我而家叩頭認錯。你唔念嚇當年僆仔嘅時候借本《玉薄團》畀你“目及”，你都念嚇呢幾年嚟我同你賣畫賣到你冚家富貴吖!況且出便有成幾兩友喺出便話，如果三炷香我攞唔到三十幅畫就劈開我幾碌啊!你幫唔幫先?
唐伯虎：三柱香?哼，嗱咪話做兄弟嘅唔睇你喇，我即管喺你靈堂同你寫副挽聯，一寫死有余辜，一寫死不足惜!你是但揀句啦。
祝枝山：哎呀，伯虎啊，你唔好咁絕好唔好啊?最多我發毒誓，如果我再賭錢嘅話，我就畀天下最丑樣嘅女人日日至體無完膚，搖搖欲墜為止，噉得未吖?
唐伯虎：嚇?!咁悲壯嘅毒誓你都發得出?好，我即管救埋你呢次啦!人嚟，文房四寶侍候!
祝枝山：唐兄忠肝義膽，俠骨丹心!
唐伯虎：廢話少講，除衫!
祝枝山：嚇?!除衫?
(地上鋪滿畫紙)
祝枝山(成身赤裸)：喂，搞邊科呀?
(唐伯虎用祝枝山的身體作畫……)
祝枝山：噉玩法?
(……)
祝枝山：嘩，認真神乎其技，真系畀你打死都抵呀!叫咩名堂啊?
唐伯虎：巴閉嘞?系叫做雄鷹展翅氣吞天下圖。呢度一幅已經抵償到你三十萬兩，請你以后唔好再嚟煩我。
祝枝山：哈，一定一定。不過我更佩服唐兄之處，系要將我胸前雙點作花，雙掌作樹，屁股化石，前足作云，后足作山。哎呀，嗰只鷹又用我身體邊部分勾出嚟呀?
唐伯虎：系用閣下嘅子孫根。
祝枝山：哈呀，果然不出我所料，雄渾激情，勾出咗佢嘅神韻呀!
唐伯虎：只不過系鷹嘴上面擔住嗰條蟲仔啫，何來雄渾激情之有?唓!
祝枝山：都好，識轉彎!
周星馳旁白：唐伯虎，于明憲宗成化六年庚寅年寅月寅日寅時出世，故名唐寅，因人屬虎，故又名唐伯虎。唐寅聰明絕頂，號稱詩畫雙杰，位列江南四大才子之首，為當時男女老少所崇拜嘅偶像。而最為人津津樂道嘅，乃系相傳佢擁有八位天姿國色溫柔賢淑嘅嬌妻，晃如神仙美眷，羨煞旁人啊!
某老婆：舉手!有冇百幾十兩喺你身度呀?攞出嚟頂住先嗱!有冇搞錯啊?!得咁少!嚟啦來嚟……我又有銀喇。
某老婆：磅水啦!
某老婆：鋪鋪你贏架，出千呀?
某老婆：旺吖嘛。
某老婆：打鑊你吖嗱!
唐伯虎：幾位娘子，有雞翼食嘞。
某老婆：起埋骨先返嚟呀?咁耐?擺定未呀，擺定未呀，快啲呀!
某老婆：得喇，催命符咩!
唐伯虎：我幅百花爭艷圖……
某老婆：哎呀，喂，家陣借嚟墊墊臺咋 ，唔使詐型呀?
某老婆：你家陣未死吖嘛，得閑咪畫過第二幅啰。
唐伯虎：但系……
某老婆：咪講咁多，嚟，猜返板先!財財，三叉仔，四伯父!飲!
唐伯虎：喂喂……
某老婆：咦呀，做咩啫?
唐伯虎：我本詩集啊!
某老婆：咦，你睇嚇，張死人臺成日岌岌貢，墊咗本都唔夠呀，幫我攞多兩本嚟吖。
唐伯虎：我幅百鳥朝凰圖，因何故冇咗只雀頭架?
某老婆：做咩咁勞噪啫?!人哋唔見咗只一索，咪借咗只雀頭嚟頂住檔先啰。大驚小怪!
唐伯虎：啊～～你你……
(唐伯虎嘅老母朱茜上吊)
唐伯虎：娘親，你做咩呀?
某老婆：哎呀，奶奶吊頸喇!你哋快啲上去睇嚇佢啦!開埋副牌先，雙天至尊!通殺!
某老婆：咦，搞錯啊!
某老婆：畀錢啦!
唐伯虎：娘親，你傻咗咩?
朱茜：娘親冇用咯!同你娶足八個老婆嚟服侍你，你都唔滿足，終日愁眉苦臉，我死咗佢好過嘞!
唐伯虎：娘親呀，你何必噉講呢?我何曾有怨過你半句得架。
朱茜：伯虎，你正所謂年少有為，事業有成，家財千萬，妻妾成籮，你應該系世上最開心嘅人嚟家嘛。
唐伯虎：我冇話過我唔開心 !
朱茜：噉點解你成日黑口黑面?系咪嫌啲家嫂配你唔起吖?
唐伯虎：娘親你唔明，千金易得，知己難求，我同幾位娘子雖有夫妻之名，只可惜同床異夢!
(眾老婆一起上吊)
眾老婆：你即系嫌棄我哋啫?噉我哋不如死咗佢算嘞!
唐伯虎：嘩!八件一齊吊?!何其壯觀呀!
朱茜：快救人呀!家嫂，家嫂，你冇事吖嘛?!伯虎，你系咪要搞到尸橫遍野，血流成河先至安樂吖?
唐伯虎：我都冇話……
某老婆：放開我……畀我死咗佢算喇……
唐伯虎：喂，你唔好噉啦，你哋!
朱茜：伯虎，你出嚇聲好唔好?
唐伯虎：唔好嘈喇!(深呼吸)系我錯!幾位娘子賢良淑德，持家有道，知書識禮，系我唔識欣賞，我對大家唔住，請大家原諒我!
眾老婆：你明白就最好啦!
某老婆：相公，笑返嚇啦!
某老婆：笑嚇啦嘛。
(唐伯虎用手指叉到個嘴好似笑噉)
某老婆：唔～我要笑得開心啲嘅!
某老婆：系咯，笑多啲。
某老婆：咦，你睇個衰樣，笑得咁格硬喎。
某老婆：系咪條氣唔順啊?
某老婆：笑勁啲呀。
唐伯虎：啊哈哈，啊哈哈~~~~~~~~~~~~~~~~~~~~
眾老婆：財財，兩家好，……
朱茜：伯虎，睇嚇佢哋幾為你吖!以后你就唔好辜負幾位家嫂對你嘅一片苦心喇。
仆人：夫人呀，寧王派人嚟要見少爺。
唐伯虎、朱茜：寧王?
朱茜：寧王而家正圖謀造反，佢派人嚟，唔通想招攬你?
唐伯虎：哎，點都好，你求其同我打發佢走算。
仆人：請 !
仆人：夫人，佢哋---
使者：哎，唐伯虎呢?我嚟王爺想請佢返去做參謀，快啲叫佢出嚟!
朱茜：幾位真系唔好意思，小兒剛患重病，不能見客，寧王好意心領喇，幾位請回啦。
使者：哈哈哈哈，又會咁啱嘅?乜王爺請親嗰啲人都話病咗架?不過王爺早料有此一著，叫我哋帶埋御醫嚟，等我哋同唐伯虎醫病。
朱茜：嗯?!
仆人：夫人……
使者：唐伯虎!(使者等人闖進屋，發現唐伯虎正在大食雞翼，問對朱茜)哎，你又話佢病咗嘅?!
朱茜：佢……佢系病得好犀利架!
使者：病得咁犀利呀，又會有咁好嘅胃口食雞翼嘅?
朱茜：系咯，點解呀?
唐伯虎：嗯……好簡單啫，因為--- (唱)燒雞翼，我鐘意食 ---
使者：(唱)但系你老母講你就快釘---
朱茜：(唱)越系快釘之所以越要整多只，如果而家唔食，以后冇機會再食!
使者：(唱)你真系就快釘?!
唐伯虎：(唱)我真系就快釘---
(三人合唱)如果而家唔食，以后冇機會再食!
使者：病到好似唐解元咁好面色都好少有 ，御醫，幫唐解元把把脈，睇嚇佢有幾嚴重?
御醫：唐解元嘅脈象四平八穩，好正常吖!冇咩問題呀!
(唐伯虎用氣功改變脈象，御醫大驚)
使者：佢點呀?
唐伯虎：有冇得救呀?
御醫：試嚇啦。
使者：佢做咩呀?
御醫：我從來都未聽過……咁亂嘅脈象!
使者：你聽到啲咩嘢?
御醫：將軍令呀!
使者：咩話?!
御醫：我睇你都系早啲準備身后事罷啦!唐解元，我哋告辭嘞!
使者：唓，早知你噉呀，就唔好嘥我哋啲時間啦!我哋走。
朱茜：御醫，你救嚇我---
朱茜(望見使者走咗)：衰仔，跪低，你記唔記得你曾經喺你死鬼老竇靈前發過誓，話唔會顯露你識武功呢個秘密，點解今日又要破戒吖?
唐伯虎：我記得，但系正話情勢危急，況且我只系用內力改變自己嘅脈搏啫。
朱茜：唔怕一萬，至怕萬一呀，一但畀唐家啲仇人發現你系霸王槍嘅傳人，你即刻有殺身之禍架!
唐伯虎：娘親，我哋唐家嘅仇人究竟系邊個?點解你一直都唔肯話我知?
朱茜：哎，我以前唔話你知，系因為你年少氣盛，驚你自找麻煩，但你而家都咁大個，我亦唔怕話你知嘞，我哋唐家，系有兩大仇口!
(回放)
朱茜：其中一個系奪命書生。當年佢哋二人為咗爭奪兵器譜上嘅排名，決定比武，我恐防奪命書生會出詭計暗算你阿爹，所以一直在場監視佢………
(唐天豪與奪命書生大戰)
朱茜：等我暗算你個仆街奪命書生先，相公，你贏硬架，放心啦!
唐天豪：高過你!
朱茜：死啦你! (用詭計，誤傷唐天豪)
唐天豪：咩嚟架?哎呀，朱茜?!
朱茜：小心呀!
朱茜：死呀?! (用詭計，又誤傷唐天豪)
唐天豪：朱茜，你---
朱茜：小心呀!
朱茜：唔得嘞，唯有用絕招啦!死啦!
(撒出許多小珠，卻再次誤中唐天豪的臉)
唐天豪：哎呀——朱茜，你究竟喺度搞咩家伙呀?
朱茜：我……啊!小心呀!
唐天豪：咪走呀!講清楚喺度搞咩先呀!
朱茜：我愛你，所有想幫你咋!
唐天豪：幫我咩呀?你撒埋曬啲噉嘅紅豆?
朱茜：呢啲唔系紅豆!呢啲系我新發明嘅暗器霹靂雷珠!
唐天豪：霹咩靂咩雷咩呀?
朱茜：咦，你唔好睇小佢呀，佢爆起上嚟威力無窮!
唐天豪：威乜叉嘢力咩呀?會爆?
(雷珠爆炸，唐天豪臉被炸腫)
唐天豪：小喇叭，朱茜，你系咪想玩嘢呀你呀?
唐伯虎：啊!書生奪命劍?!
(返回現在)
朱茜：就喺最危急嘅關頭，你阿爹突然使出世間上最恐怖最得人驚嘅獨門暗器，將整個局面扭轉曬。
(又回到回放)
唐天豪：放暗器!(把朱茜扔了出去)
唐天豪：霸王回馬槍!(槍頭被奪命書生折斷)冇槍頭嘅?!
(奪命書生一劍刺中天豪)
唐天豪：點解?
(返回現在)
唐伯虎：唔怪得阿爹最后都郁郁而終。
朱茜：你阿爹估唔到奪命書生連精鋼制造嘅槍頭都可以打斷，所以佢喺臨死嘅時候，就特別制造咗呢個堅硬無匹嘅寒鐵槍頭，以防奪命書生趕盡殺絕。
唐伯虎：但系你話我哋有兩大仇家，另外一個系邊個?
朱茜：另一個就系當年同我爭你阿爹嘅情敵喇，不過佢已經嫁咗人，怕且呀都冇乜機會撞到架喇。
唐伯虎：娘親，呢幾日我想離家出外幾日暫避風，因為我怕寧王再揾人嚟找我麻煩。
朱茜：最緊要隨身帶埋支寒鐵槍頭以防萬一呀，記住呀!由于當年你爹打輸咗，所以當今兵器譜上便，書生奪命劍排行第二，我哋霸王槍排行第三，小李飛刀緊隨第四。
某老婆：(路過)縮開只腳啦!
唐伯虎：噉排名第一嘅系邊個呢?
朱茜：佢就系小李飛刀嘅娘親，可惜已經過咗身呢!
唐伯虎：哦，原來就系小李老母飛刀，真可惜!
某老婆：喂，講咁多做咩呀?猜兩板先啦。(跟伯虎劃拳)財財呀!一定中，你頂帽!飲!哎呀，你咁屎， 行開啦，我同奶奶猜呀。(兩人猜拳)財財呀，三叉仔呀，九……奶奶你輸咗呀，飲!
朱茜：飲咪飲!
眾老婆：買大細呀!落落落!買定離手啦!要開啦，開……打你個仆街呀。買定離手……
唐伯虎：(無奈)我個心又悲，個心又痛，八個老婆都沙里弄寵，人家當我享盡齊人福，查實空虛寂寞兼且凍，兼且凍!
(江南四大才子結伴出游)
一女子：睇嚇，睇嚇，江南四大才子喺嗰邊呀。
(眾女子興奮觀看)
(四大才子擺POSE，眾女子傾倒逃散)
(一女子被四人攔住，被迫跳河)
唐伯虎：想走?飛唔出我五指山嘅。(欲跳下河被攔住)
祝枝山：伯虎兄，好多人呀。
祝枝山：哈哈，我哋今日江南四大才子嚟到游山玩水，唔怪得女子咁瘋狂呀。
周文斌：難怪難怪!
文徵明：各位各位，今日大家咁高興，不如吟嚇詩咧?
祝枝山：征明兄好提議。文斌兄先嚟咧。
周文斌：強項啦!山下一群鵝。
文徵明：噓聲趕落河。
祝枝山：噉呀落河捉鵝醫肚餓。
唐伯虎：食完返歸鋤老婆。
三人：嘩呀，好句呀!好句呀!絕句!絕句!
唐伯虎：啊哈哈~~~~~~~~~~~~~~~~~~~~~~~~~~~~~~~~`
三人：真系咁好笑?!
文徵明：點解唐兄次次出游都咁豪情奔放呢?
周文斌：樂極忘形，實在令人羨慕羨慕。
祝枝山：講開又講喇，喺江南論文章，唐兄才高八斗，論丹青，妙筆生花，呢啲真真正正嘅架勢堂啊。
周文斌：冇錯呀，更令人羨慕嘅呢就系佢喺音律方面都好高造詣架喇。
唐伯虎：噉呀系呀，古今中外各種樂器我邊樣唔lun得出神入化。喂，我最近重研究一種西洋嘅敲擊樂，很使得。有機會可以同大家一齊研究一下。
周文斌：一定一定!
文徵明：不過計我話唐兄最令人羨慕之處就莫過于艷福喇。系人都知，唐兄家中有八位夫人，個個貌美如花，國色天香。做人做著你噉，夫復何求呢?
祝枝山：羨煞旁人呀。
唐伯虎：啊哈哈~~~~~
祝枝山：有郇嘢“目及” 。
祝枝山：哎，唐兄，你望一望橋頭上有個婀娜多姿嘅美女，只影形影單呀。喂，不如噉嘞，你即場示范你嘅溝女大法畀幾個兄弟學習學習咧。
唐伯虎：噉呀……
周文斌：啲大朋福利，冇問題吖嘛?!
唐伯虎： 義不容辭吖。
祝枝山：去啦。
唐伯虎： 小姐。
女子：咩事呀公子?(一回頭，竟是如花!±#$%×*)
三人(喺遠處)：上!上!
唐伯虎：冇，我想借小姐嘅肩膀嚟搭一下，唔知有冇問題呢?
如花：咁點得呀?我系一個黃花閨女嚟家嘛。
唐伯虎：我知，我都系應酬嚇啲朋友噉解嘅啫。其實在下正是唐伯虎。
如花： 唐咩伯咩虎，我都唔識你。你再唔走，我嗌架。
唐伯虎：噉咧，我畀一兩銀你系噉意咧。
如花：一兩銀?你當我系咩，起碼都十兩啦!
唐伯虎：嘩!你都要十兩?!唔好去搶!
如花(掹刀出嚟)：冇錯，就系搶!僆仔，攞錢嚟!
(兩人亂打)
唐伯虎：你……你……
如花：死喇!
唐伯虎：噍你!
三人：哎?搞咩呢呵?
(三人趕到橋上，最后如花被唐伯虎打落河中)
文徵明：哇，使唔使咁重手呀?!
唐伯虎：搶錢架，呢條死人妖!
三人：嚇?!人妖?
祝枝山：我啱呀!你揸住。 (祝枝山將折扇遞給文斌，跳入河中)
文徵明：真唔抵!畀佢走先一步!
(華夫人帶眾人去拜神，氣勢宏偉)
春香：你睇嚇，好多人呀。
夏香：系呀，好熱鬧啊。
華夫人：春香，夏香，做乜嘢呀?唔好失禮人呀。
(路人均爭先恐后的圍觀)
四大才子：喂，借借!
某人：今日華太夫人帶住四香入廟進香啊。
文斌：聽講個個都天仙下凡，尤其個秋香至省鏡喎。
唐伯虎： 邊個呀?邊個系呀?
文斌、文徵明：呢，嗱嗱，嗰邊呀!秋香~~~
(秋香回首一笑)
唐伯虎：超，普通料嚟咋 !
文斌：噉呀唔系 ，伯虎兄，須知美女依家嘢呢，同鮮花一樣，需要有綠葉嘅襯托至顯得出嬌媚架。睇多次吖。
文斌、文征明：靚女~~~
(旁人皆成丑女襯托)
唐伯虎：哇!噉睇法真系索到拍拍聲 。喂我哋一齊入廟，揾著數咧!
(四大才子裝扮成乞丐)
三人：睇你就好喇!
唐伯虎：強項啦。
唐伯虎：陣間一有機會擁埋去大肆搜掠一番呀。
祝枝山：一定啦!
華夫人：施舍啲包畀乞丐食啦。
四香：系，夫人。
(四香施舍乞丐)
唐伯虎：(抱住秋香只腳)救命呀!好肚餓呀!
秋香： 你肚餓呀?噉你食先啦。(遞饅頭給唐伯虎)做咩呀?一個唔夠啊?畀多個你吖。
秋香(繼續派包畀其他人)：你哋過嚟吖，呢邊重有呀。
(秋香充滿愛心。秋香回首對唐伯虎二笑)
唐伯虎：(心語)原來當今世上最美麗嘅笑容，就系充滿愛心嘅笑容!我已經揾到我嘅理想，佢就系秋香!
華夫人：秋香，我要入去同呢度嘅主持正一法師傾偈，你去幫我求支平安簽返嚟。
秋香：系，夫人。
(秋香跪在地上求簽，唐伯虎練練聲之后走過去)
唐伯虎：咦，小姐，拜神呀?
(秋香點頭)
唐伯虎：好嘅，拜得神多自有神庇佑吖嘛。
(簽掉在地上)
唐伯虎：我嚟。
(故意不給秋香，音樂響起，正想唱歌，被一僧人一腳~~~~~~踢到廟門口，僧人拿出一匾，上書“室內嚴禁喧嘩”)
(再進寺內，秋香己走，唐伯虎坐船去追)
唐伯虎：兄弟，即刻同我追華府只官船。
船夫：好呀!好聲好聲!
船夫：啊，公子呀，你呀真系識貨喇，咁多船唔揀你揀著我呢只船，我出咗名夠快嘅。
唐伯虎：嚇嘩?
唐伯虎：喂~~~你只船沉緊喎，你只船!
船夫：系吖，沉得快吖嘛。
唐伯虎：做咩搞啲噉嘅嘢呀?我趕趕時間家嘛，大佬呀!
船夫：睇你嘅樣，梗系追秋香姐咧。
唐伯虎：你又知?
船夫：你啲噉嘅富家公子我年中見唔少喇。不過凈系喺華府門口啄嚇啄嚇揾唔到食嘅。
唐伯虎：噉你有咩好橋呢?
船夫：要諗辦法混入華府至掂家嘛。
唐伯虎：你過一兩條橋過嚟旁嚇身好 。
船夫：橋唔系冇，睇你識唔識做。
唐伯虎：挑，點話點好啦。
船夫：噉你聽住咯噃~~~~~~~
(兩人和船沉入水中)
(華府門前，唐伯虎和船夫推著木車)
唐伯虎：喂，陣間開檔架嘞，你死人都唔好喐呀。
船夫：你話將賣到啲錢畀曬我，你唔好老點噃。
唐伯虎：以你嘅智慧，邊有人點到你啫?
船夫：噉呀系。
(船夫躺在車上裝死)
唐伯虎：喂，明益街坊呀喇，全新第一手好靚嘅孝子大平賣，唔買都嚟睇嚇嘞喂!
(秋香和華府婢女石榴姐出門)
唐伯虎：好慘呀，真系。
石榴姐：靚仔呀，你晨早流流喺度賣身葬父，好大吉利是架 。
唐伯虎：唉，我都唔想架。
秋香：點解你咁熟面口嘅，我哋喺邊度見過?
石榴姐：系咩?
唐伯虎：所謂相逢何必曾相識呢，不如兩位姐姐仔可憐嚇我罷啦!
石榴姐：真系慘咯!橫掂我哋爭個下人，不如就--
(這時又來一個，推著木車，車上六個死人，這人還口吐鮮血，極其悲慘!)
慘人：好慘啊，賣身葬冚家!
唐伯虎：唔系啩?!
慘人： 兩位姑娘仔，可憐嚇我啦，我冚家六件一晚死曬。我身染十級肺癆，半賣半送，你買我啦。
秋香：石榴呀，睇佢真系慘好多呀，不如都系買佢返華府罷啦。
石榴姐：(哭)噉就買佢啦。
唐伯虎：姐姐，我嚟先架 。
秋香：呢個唔系先后嘅問題吖嘛。
石榴姐：系咯，人哋死六件，你先死得個一件。我都好想幫你，但好難做家嘛。
唐伯虎：但系我都慘架噃?
石榴姐：噉你有咩慘嘅嘢，你曬埋出嚟吖。
唐伯虎：我……我……，你睇我幾日冇剪指甲，困曬黑邊架喇，唔通噉都重唔夠慘咩?
(慘人的小狗突然死去)
慘人：(痛哭)旺財……旺財……旺財你唔好死啊，旺財，你跟我咁耐，對我有情有義，肝膽相照，但系大佬未曾畀過一餐飽飯你食，我對你唔住啊!
(唐伯虎看見一只曱甴，叫“小心呀!”，石榴姐一退，將曱甴踩死咗。)
唐伯虎：(悲痛欲絕)哎呀!小強!小強你點呀小強?小強，你唔好死啊小強!我同你相依為命，同甘共苦咗咁多年，已經當你系我親生骨肉噉攻書教學，估唔到今日，白頭人送黑頭人!
石榴姐：秋香姐，佢兩個都咁慘，噉點呀?
秋香：睇定啲先。
石榴姐：哦。
慘人：吆!(走到唐伯虎跟前，兩人對峙)阿哥，你等陣先。你睇嚇你身光頸靚，返去化過妝先啦。你睇嚇我，奀挑鬼命，滿手毒瘡，你夠我慘唔夠呀?
唐伯虎：喂，兄弟唔好大我，我份人唔大得架 !
慘人：大你咪大你啰?
唐伯虎：你家嚇迫我嚇嘩，你家嚇?
慘人：系慘過你呀?吹咩?
唐伯虎：吆!(拾起一根棍，將自己的胳膊打斷)仆街啦!哎呀。唔好話你滿手毒瘡，家嚇成只手斷埋，睇嚇邊個慘吖!
慘人：你使唔使玩到咁盡呀?!
唐伯虎：直情系曬你冷架，吹咩?
慘人：我跟你個曬冷!仆你個街啦!(拿棍子砸破自己的頭，血流如注)哎呀!哈哈，同我玩嘢?我而家命都唔要，睇你點大我!邊-個-夠-我-慘-呀?!(倒地身亡)
唐伯虎：僆仔，你好嘢，山水有相逢呀!
石榴姐：喂喂喂，佢而家死咗，我買你吖!
唐伯虎：系?
石榴姐：系!
唐伯虎：噉要加多五兩銀。
石榴姐：嘩，你坐地價都有嘅?!
唐伯虎：冇，我想葬埋呢位仁兄啫。
石榴姐： 真系好人喇，就買佢啦。(拿出銀子)
秋香：哎，石榴，你話買就買架喇!返入去問嚇夫人先再算啦。你聽日再嚟過吖。
石榴姐：我去問喇。
唐伯虎：秋香姐，辛苦曬你!
(秋香進門時回首對唐伯虎三笑)
唐伯虎：嘩，噉笑法擺明系挑逗吖。阿媽!我得咗嘞~
(第二天，華府內)
管家：念在你一片孝心，就買你入嚟華府做下人啦，為期兩年，有冇問題?
唐伯虎：冇問題!
管家：噉呀簽咗份契約先啦。
唐伯虎：簽緊!(唐伯虎自己立下了賣身契約)
(唐伯虎身穿下人服裝，興奮的去華府院內開工)
(“武狀元到!”“重唔踎低!”一下人將唐伯虎按下蹲在地上，雙手放在腦后)
武狀元：新仔，由今日開始，你就系華府嘅低等下人，9527就系你終身號碼。開始做嘢!
眾下人：(列隊跑步，唱行軍歌)死做爛做似條雞……
武狀元：被人鬧重要開口笑，似只雞，好好笑。
眾下人：被人鬧重笑笑口，似只雞，好好笑。
(四香路過竊笑這些下人，唐伯虎盯著秋香看，無意撞到了武狀元，被罰做俯臥撐)
武狀元：(計數)1001，1002，1003，1004……，睇你做到噉嘅衰樣，趌高籮柚，再嚟過!(踢唐伯虎) 1，2……
(唐伯虎燒雞時，偷畫秋香畫像)
武狀元：爽手呀!燒靚啲呀，左髀通通留畀我!
(開飯唐伯虎沒搶到飯。掃狗屎被弄一狗屎。)
(四香在放風箏。)
唐伯虎(諗)：機會嚟嘞。(用瓦片將風箏線打斷，風箏落在屋頂)
四香：哎呀，斷咗線喇，噉點算啊?
唐伯虎：幾位姐姐，發生咩事干呀?
夏香：9527，快啲同我哋攞返只紙鷂落嚟吖!
唐伯虎：但我作為一個低等嘅下人，唔方便入嚟嘅。
夏香：邊個話當你系低等下人啫?我只系當你系只狗咋。
唐伯虎：啊?!
冬香：哎呀，叫你去攞你就去攞啦。
冬香：就喺上便呀。
唐伯虎：秋香姐，幸會幸會。上次到而家我都重未曾有機會多謝你添。好在有緣千里能相會，你只紙鷂包在我身上。
春香：咁多嘢講!去執啦!
唐伯虎：系嘅系嘅。(爬上屋頂，攞到紙鷂)
四香：9527，小心啲呀!
唐伯虎：多謝關心呀，秋香姐……(腳下一滑，掉在地上)
秋香：(扶起唐伯虎，關心)9527，你點呀?你冇嘢吖嘛?
唐伯虎：我冇嘢，只系斷咗只手啫。
秋香：點解咁唔小心呀?
唐伯虎：只要能夠同你執返只紙鷂，我不怕千刀萬斬，甘愿勇闖地獄，家嚇區區一條手臂，何足掛齒呢?
秋香：我怪錯咗你嘞，對唔住。
唐伯虎：嗱，我唔準你噉講呀，人誰無過得架?
(兩人含情相忘，欲親吻)
秋香：唔得，唔得架!
唐伯虎：噉算嘞。
秋香：唔好走啊。
(兩人擁抱親吻)
三香：(鼓掌)好咯，有情人終成眷屬咯!
(屋頂上唐伯虎哈哈大笑，笑得滿頭大汗，原來剛才那一幕是唐伯虎的幻想)
冬香：佢喺上邊笑咩呀?
秋香：我睇嚇你喺度搞乜鬼!
春香：9527，你做咩呀?快啲落嚟呀!
唐伯虎：嚟緊。(假裝腳下一滑，向地下落去)(暗想)秋香，我嚟嘞!
(剛要落地，卻被武狀元接住，抱在懷中)
武狀元：僆仔!我收到風你偷偷地畫佢個樣，系唔系?
唐伯虎：細佬生平畫過唔少畫，唔知你指邊幅呢?
武狀元：(從唐伯虎衣內拿出唐偷畫的秋香畫像)大家睇嚇佢畫啲乜嘢?
武狀元：你居然將我風華絕代婀娜多姿美麗動人嘅石榴姐畫到噉嘅衰樣!
唐伯虎：對唔住，我學嚇嘢噉解嘅啫，畀返我先。
武狀元：呸!你冇天份就唔好畫!(撕畫)重學人畫嘢!我冇辦法唔畀你開嚇眼界嘞，學嘢啦!(掏出自己畫的畫)呢啲先叫畫!
唐伯虎：哼!真系強中自有強中手，一山還有一山高，小弟甘拜下風!(吐)
武狀元：嚟~~~，大家鑒賞一下。
(眾下人鼓掌，吐)
武狀元：你而家知道咩叫畫啦。你唔單止偷懶，重同我爭女!(命令眾下人)噍佢!
(唐伯虎被一頓痛扁)
秋香：你哋唔好打呀。再唔停手我就話畀夫人知。
武狀元：哎，停手!我畀面秋香姐，我哋走!(眾人離去)
秋香：喂，你死得未呀?
唐伯虎：未，我一日未將只紙鷂親手交畀秋香姐你，一日都唔可以死。秋香姐--(紙鷂己折斷)
秋香：哼!我哋走。
春香：冇咁容易，累我哋冇得玩紙鷂，打佢!
(又挨一頓痛扁)
唐伯虎：好在我拼命噉蒙住塊面，噉我英俊嘅相貌亦得以保存，今晚就揾機會向佢嚟表白，看你個秋香對我動情不動情!
(一轉身，右眼挨了一拳)
唐伯虎：邊個打我?
石榴姐：系我風華絕代，萬人驚艷嘅石榴。
唐伯虎：系你?我同你無冤無仇……
石榴姐：我打!(唐伯虎又中一拳，鼻血流下)
唐伯虎：點解?
石榴姐：點解?!因為你抵打!你偷畫我暗戀我嘅事，而家系人都知啦，我重邊有面目見人啫?我死咗佢罷啦!
唐伯虎：都好嘅。
石榴姐：你就梗系好定嘞，你想同我一齊死，做對同命嘅鴛鴦?呸!我都冇話接受你嘅愛。
唐伯虎：石榴姐你誤會嘞，其實我對你就如同對我自己親生阿媽一樣咁尊重。
石榴姐： 阿媽?!你居然愛上自己個阿媽?!天呀，呢種大逆不道，喪盡天良嘅事，實在太刺激嘞!未試過架，我有少少緊張呀，嚟吖!快啲呀!
唐伯虎：哎!石榴姐你癲咗咩你而家?!
石榴姐： (仰面躺在地上)咪再多講啦，做啦!唔好因為我系嬌花而擏住我，出力呀!
淫賊之一：(一腳踩在石榴姐臉上)一嚟就整件咁丑樣嘅，真唔老利!
唐伯虎：跩得好!
(墻上又跳下三人，將唐伯虎抓住)
淫賊之一：大佬，久聞春，夏，秋，冬四香個個都貌美如花，尤其系嗰個秋香添簡直靚到攞膽呀。
淫賊之二：秋香梗系益大佬啦。
東淫：噉呀當然啦。
淫賊之一：大佬呀，呢個點呀?殺咗佢呀?
東淫：哎~~，呢對狗男女都可算系同道中人，打暈佢算啦。
淫賊之一：好啊。
唐伯虎：哎~~，四位莫非就系名震江南嘅四大淫俠?!
四淫賊：冇錯，(POSE)我哋就系東淫西賤南咸北濕!
唐伯虎：哇呀呀呀呀~~~~~~~~，好!實不相瞞，其實小弟我亦系人稱玉樹臨風勝潘安，一樹李花壓海棠嘅小周伯通!
淫賊之一：未聽過喎!
東淫：哎~~~呢位小兄弟呀，佢連咁“jaap”佢都肯上，小呢個稱號真系當之無愧呀。
唐伯虎：呢啲小意思啫，再“jaap”啲我都試過!
東淫：嘩?!我真系再嗌你一聲大佬呀!
唐伯虎：不敢當，不敢當!正話我聽幾位講，話想入去咸濕嚇個秋香?
東淫：噉呀系吖。
唐伯虎：唔嫌棄等我嚟帶路咧。
東淫：啊~~~~，你想執二攤呀?!噉你排第一啦!
唐伯虎：多謝多謝!
大話周 星馳站 zho uxingchi.cn
東淫：(四人從石榴姐身上踩過)抹干凈鞋底，唔好留低腳印!
(唐伯虎帶四人繞來繞去，將四人甩開)
四淫賊：咦，點解兜嚇兜嚇唔見咗個小嘅?快啲揾佢返嚟帶路!
唐伯虎：(找到秋香的房間)揾到嘞。(進入房間)
唐伯虎：噓~~~
秋香：9527，你入嚟做咩呀?
唐伯虎：不得了嘞秋香姐，出便有幾個淫賊想嚟咸濕你!
秋香：(不以為然)哦，我真系好驚呀，噉而家點算好呀?
唐伯虎：好彩我已經暫時引開咗佢哋，華府咁大，要揾到嚟都唔系咁容易!不如--
秋香：點解你流緊鼻血嘅?
唐伯虎：就系畀嗰幾個淫賊打傷架。但系呢小意思嚟啫!為咗救秋香姐你，我死又何妨呢?你而家嗱嗱聲跟我去一笪冇人嘅地方匿埋再算。以防萬一，等我出去睇睇先!
(秋香伸腳將唐伯虎絆倒，有流很多鼻血)
唐伯虎：唔緊要，唔緊要，我冇事。
秋香：企喺度!你自己咪就系嗰個淫賊啰。
唐伯虎： 嚴格嚟講我都系賊，不過唔系淫賊，你可以稱我為一個偷心嘅賊!
秋香：我唔理你系咩賊，請你唔好再喺我面前整古做怪，只會令我更加討厭你!
唐伯虎：秋香姐，當你發覺你冤捩緊我嘅時候，一定會好傷心，好后悔，噉又何苦呢?都系快啲跟我走!
秋香：縮開!如果真系有賊嘅，點解唔話畀夫人知，偷入嚟我房做咩呀?!你咪恃住讀過兩年書，就周圍輕薄啲無知女子。我話畀你聽，男人窮唔緊要，最緊要有骨氣，有才學，好似你呢庭人就算讀死一世書只不過系廢物!
唐伯虎：講得好!我作為一個男子漢聽到呢番對白好應該打到你爆缸，但系我唔會噉做，可能你講得啱，我真系一個廢物都未……
秋香：你真系廢物都不如，應該叫你做狗賊!
唐伯虎：互，好一句狗賊，睇嚟你真系好憎我，既然系噉，秋香姐何苦對我三笑留情?
秋香：(嗤笑)有咩?!我會對你笑咩?!
唐伯虎：嗱，又嚟嘞!
秋香：就算真系對你笑，都系笑你系個白癡咋!
唐伯虎：原來落花有意隨流水，而流水無心戀落花。對唔住，系我自作多情。但出便真系好危險，你自己千萬要小心!
(轉身撞在門柱上)
秋香：點解呢個世界咁多無聊嘅廢物!唔通只有唐伯虎至稱得上為男子漢?!只有真正嘅男人先能夠寫出咁靚嘅詩句。“桃花塢里桃花庵，桃花庵下桃花仙。桃花仙人種桃樹，又摘桃花換酒錢。”
唐伯虎：(才子模樣，站到桌上)“別人笑我太瘋癲，我笑他人看不穿。不見五陵豪杰墓，無花無酒鋤作田。”
(秋香與才子模樣的唐伯虎含情相忘)
唐伯虎：果然系好詩!
(秋香一眨眼，發現還是華安)
秋香：企到咁高做咩呀你?唐伯虎嘅詩由你把口讀出嚟，簡直系一種侮辱!你冇資格讀佢嘅詩，你即刻同我躝!(開門)
唐伯虎：(一把抓住秋香的手)小心!出便危險呀!
唐伯虎：(摟著秋香的腰)秋香，我總算明白你嘅心意。
秋香：(掙脫)放肆，你實在太過分嘞，你再唔出去，我就唔客氣嚇!(拿出一根棍)唔好迫我出絕招呀!
唐伯虎：(笑)秋香，你實在太沖動嘞，但好難怪，你年紀重細，但我真系好喜歡--
秋香：十字追魂棍!(舉棍欲打)
唐伯虎：事到如今，冇辦法再隱瞞，你聽清楚，其實我就系唐--伯--虎!(棍到跟前陡然停住)
秋香：唐伯虎?!
唐伯虎：(POSE)點睇?!
秋香：你系唐伯虎我就系觀世音啊攞你命!
(秋香變出一根更粗的棍了將唐伯虎打出門外，門外四大淫賊剛趕到，唐伯虎摔倒壓在東淫身上)
東淫：哎呀，咁大力飛落嚟嘅?你個小，簡直系大咸濕啊!
淫賊之一：醒醒呀大佬。
秋香：大佬?!捉賊呀!捉賊呀!有賊呀!捉賊呀!捉賊呀!放開我呀!放開我呀!放開我呀!救命呀!放手呀!
(唐伯虎口吐白沫，己被打暈。四淫賊將秋香劫走。秋香在房內讀的書《唐寅詩集》掉在地上。)
武狀元：(攔住四賊)咪喐!舉手投降!
一淫賊：吃屎啦!
(四人與武狀元大戰)
一仆人：唔好畀佢哋走，通知夫人。
(華夫人出現)
華夫人：嚟吖!
(華夫人用武功輕易將四賊擒住)
華夫人：武狀元，呢幾個賊系點入嚟嘅?
武狀元：夫人……
秋香：夫人嗱，我見到9527同呢幾個人一齊架。
唐伯虎：啊?!
華夫人：日防夜防，家賊難防!將佢哋一干人等，送官治理!
唐伯虎：冤枉呀，夫人!
一下人：夫人嗱，我頭先喺地下執到本書 。
(原來正是秋香丟的《唐寅詩集》)
華夫人：混賬!呢本《唐寅詩集》系邊個嘅?我講過好多次，華府之內絕唔允許有唐伯虎嘅物件出現嘅!呢本書到底系邊個嘅?快啲自己招認咯 !秋香，系邊個嘅?
秋香：(色變)夫人……我……
華夫人：快啲講!
唐伯虎： 夫人，細佬知道系邊個嘅。
華夫人：講呀!
唐伯虎：系細佬嘅，要懲罰請你懲罰埋細佬。
華夫人：武狀元!
武狀元：系!夫人!(伸手向唐伯虎)攞你細佬出嚟!
唐伯虎：夫人，細佬嘅意思正是小弟。
華夫人：既然系噉，好，拉佢出去斬成肉漿，喂狗!
唐伯虎：夫人，唔好呀!實情我只系想引開啲賊，嚟救阿秋香嘅啫。
秋香：夫人--
華夫人：我唔理你同嗰幾個賊有咩關系，身藏《唐寅詩集》已經系死罪，拖佢出去!
唐伯虎： 夫人，請聽我解釋啊。
華夫人：重有咩好解釋呀?
唐伯虎：(筷子敲碗伴奏)稟夫人，小人本住在蘇州嘅城邊，家中有屋又有田，生活樂無邊。點知個唐伯虎，佢橫蠻不檢點，勾結官府目無天，巧取豪奪我家田。我阿爺同佢反面，慘被佢一棍來打扁，我阿嫲鬧佢欺善，更被佢捉了去唐府，強暴了一百遍，一百遍，最后重懸梁自殺慘無邊。佢還將我父子，逐出了家園，流落到江邊。我為求養老父，只有獨自行乞在廟前。點知個唐伯虎，佢實在太陰險，知道此情形，竟派人來暗算，把我父子狂毆在市前，小人身壯健，殘命得留存，可憐老父佢魂歸天!此恨更難填。為求葬老父，唯有賣身為奴咁作賤，一面勤賺錢，我一面讀書篇，發誓把功名顯，手刃仇人意志堅!從此唐寅詩集伴身邊，我永記此仇不共戴天!!!
(唐伯虎用蠟燭作鼓棒，木凳作鼓，來了一段刺激的打擊樂，眾人皆陶醉)
華夫人：(內心獨白)實在太刺激嘞，我真系忍不住要贊佢!唔得，我唔可以表露出嚟嘅。但系呢種感覺真系令人有如騰云駕霧一樣，他咁感人肺俯嘅自白，居然用到調皮鬼馬嘅數板形式嚟表達，再加上節奏感強勁嘅敲擊樂作為結尾，真系聽到我高潮一浪接一浪呀!
某香：(心)系呀，佢嗰種洶涌澎湃嘅創作力，就好似多春魚體內嘅春一樣，成千上萬，源源不絕啊!
某香：(心)冇錯，我就系嗰條多春魚，我而家充滿力量喇!
三香：(心)多謝你呀，9527!
武狀元：重未夠感人，睇我表演吖你哋。點解食完飯，一定要屙屎，屙完屎重系要擦，慘————!
(華夫人及三香一驚，從幻想回到現實)
華人人：哦，原來你同唐伯虎都有不共戴天之仇嘅。
唐伯虎：系呀，夫人。
秋香：夫人呀，呢個奴才雖則系貪生怕死，但亦非一無是處，我見佢出口成文，似乎都讀過幾年書吖。如今書房正欠一個伴讀書僮，何不要佢帶罪立功，陪伴兩位公子讀書噉咪重好?
華夫人：既然秋香為你求情，就免你一死。從今日開始，我就賜你嘅名叫華--勝啦!
唐伯虎：啊?!夫人，呢個名我恐防受唔得起 。
華夫人：噉呀?噉就叫華安喇。
唐伯虎：謝夫人!
(公子書房)
華文：我系都要秋香幫我磨墨架喇。
華武：你系唔系系都要同我爭秋香先?!
華文：我系大佬，梗系我架喇!
華武：溝女有分大細嘅咩?!
華文：你系都要同我捻呀?!
華武：捻咪捻啰。
華文：頂你個肺!(將一個毛筆插入華武鼻孔內)
華武：你插細佬?!仆你個街啦!
華文：哎呀!大佬你都插?!同你死過!
(兩人打)
華文：為咗秋香，兄弟都冇情講!
(唐伯虎推門進來，將兩位公子擠在門后)
唐伯虎：順利過關成為書童，一切都盡在我掌握中，越嚟越接近秋香姐，今日嘅心情就確系唔同，就確系唔同唔同!哎?兩位公子呢?!
華文、武(被毛筆插咗入口)：你條契弟系邊個呀?
唐伯虎：我系負責嚟陪兩位讀書嘅書僮啫。
華武：哦!就系尋晚拍臺拍凳嘈住我哋瞓覺嗰個粉腸呀?!
唐伯虎：正是!咦~~~~~兩位公子骨胳精奇，能夠服侍兩位真系萬幸!
華文：嗯~~~你呢句說話都幾啱聽，以后就當你系人噉看待啦。
華武：去斟茶!
唐伯虎：對唔住，細佬有三不做嘅。
華武：咩三不做呀?
唐伯虎：我一不斟茶遞水，二不洗衫掃地，三不鋪床摺被!
華武：(對華文說)噉即系同我哋一樣 !
華文：噉你識做啲咩呀?
唐伯虎：我曉--，嗨嗨~~~~吹口琴，lun玉簫，炒碟靚蜆，焗個蛋撻，占卜星相就觀人宇眉，風流自命，竊玉偷香!
華武：真唔真呀?
華文：畀啲本事睇嚇咧。
唐伯虎：喺呢度……恐防不便示范 。
華文：想縮沙呀?話咗你作大嘅呢。
華武：有本事就睇嚇我哋兩個!
唐伯虎：嗯……
華文：挑!答唔出咧?!
唐伯虎：(拍桌而起)若然我冇睇錯，兩位應該系--低能嘅!
華文：噉都畀你睇得出?!
華武：我真系佩服到五體投地呀!
華文、武：容許畀我哋叫你一聲大佬嘛?
唐伯虎：呣~~~叫唔叫唔相干喇，以后你同我斟茶遞水，洗衣摺被就夠嘞。
(先生推門進入)
先生：噯?華文，華武，你兩個跪在地上所因何事呀?
華文華武：我哋拜大佬呀!
先生：區區一個書僮何德何能做人大佬呀?
唐伯虎：在下無德無能，只系開嚇玩笑，望老師見諒!
華文華武：唔系呀，華安，我哋跟硬你架喇!
先生：年輕人，你夠膽撬我啲僆，你邊度架?
唐伯虎：未請教---
先生：教上教。
唐伯虎：先請而后教。
先生：后教而先請。
唐伯虎：先請而先教。
先生：后教而后請。
唐伯虎：再請我就教。
先生：你企穩呀喇!我本身原藉四水，現為華府首籍西賓，手執一把扇!你系咩部門架?
唐伯虎：我原籍蘇州，現任華府一件迷途小書童，門前一對雙花齊眉棍!
先生：呸!你大我呀?(老先生脫去上衣，露出紋身)
眾人：嘩!
先生：我左邊龍，右邊虎，老牛在腰間，龍頭在心口，人擋殺人，佛擋殺佛!
(先生從腰間抽出一把砍刀，躍到門后)
華太師：華文，華武!(華老爺推門而入，正好將教書先生殺死)老師，你做咩呀?(問華文、武)喂，點解老師噉嘅?
華文：阿爹，剛才你唔覺意懟冧咗老師呀!
華武：恭喜阿爹你殺咗人呀。
唐伯虎：非也，非也!剛才我見到老師玩緊“神打上身”，以為刀槍不入，點知標唔到童，入咗!啱唔啱聽呀，太師?
華太師：系!啱聽，事實系噉吖嘛。人嚟，抬老師出去!哎，你系邊個呀?
華文：佢叫華安，陪我哋讀書嘅。
華武：系呀，阿爹。
華太師：華安，你講得好，立咗大功。
唐伯虎：小意思啫。
華太師：我決定升你做高級伴讀書僮!以后負責教導佢兩個讀書，知道嘛?
唐伯虎：謝太師!
(華安升職。華安和四香關系融恰……)
(三香吵著要華安吟詩)
三香：華安，吟啦。系啰，吟啦。耶，好似嗰晚嗰啲噉呢。嚟呀。吟啦。
華安：嗱，噉聽住咯噃。
三香：好呀!好呀!
華安：一個華安兩只眼，三個姑娘六只奶。
三香：啊!咦!
(三人嬌嗔跑開，碰見秋香)
秋香：做咩呀?
一香：華安講衰嘢呀!
一香：系呀!
唐伯虎：秋香姐。
秋香：華安呀，你又喺度整蠱人啦?
唐伯虎：冇啊，我念詩之嘛。
秋香：念咩詩呀?念唐伯虎嘅詩?
唐伯虎：當然唔會啦，唐伯虎同我咁大嘅仇口。
秋香：你唔使亂講，你呃到夫人呃唔到我嘅。不過，嗰個故仔你都改得幾精彩吖。
唐伯虎：秋香姐果然冰雪聰明，細佬佩服。
秋香：噉嗰晚點解要喺我間房冒認系唐伯虎吖?
唐伯虎：嗯，你估嚇。(轉身走開)
秋香：(追上)喂，你估我唔知呀，你一定系識得唐伯虎嘅?!
唐伯虎：當然識架。
秋香：噉可唔可以介紹畀我識啫?
唐伯虎：我咪系!
秋香：哎呀，你唔好喺度講笑啦，我系認真架。
唐伯虎：唉，人稱詩畫雙絕，風流不羈嘅唐伯虎系人都識架啦，之不過佢唔識我啫，哼哼哼~~~~~
秋香：我話你講得唔啱!風流不羈只系佢嘅表面，我讀過佢嘅詩，喺字里行間，睇得出……佢系一個用情專一，真情真義嘅男子漢。(唐伯虎感動)喂，你做咩呀?
唐伯虎：我感動到有點想喊。你嘅觀察力真系驚天地，泣鬼神。如果唐伯虎能夠有你你個紅顏知已，真系死而無憾!
秋香：你呃人吖你!
唐伯虎：秋香姐!噉你覺得我呢個華安嘅人品又點啫?
秋香：我覺得你--系一個傻瓜啰!
唐伯虎：秋香姐!噉你愿唔愿意同一個傻瓜，喺今晚三更時分，柳樹之前，一齊研究詩詞歌賦呢你估?
秋香：(沉思片該)好呀!
唐伯虎：多謝!
秋香：唔使客氣。
三香：撲街喇!
夏香：秋香姐，唐伯虎畀武狀元捉咗返嚟呀!
唐伯虎，秋香：啊?!
(華府客廳內)
祝枝山：救命啊!
武狀元：收聲!
祝枝山：收咩聲呀?
武狀元：夫人，我喺蘇州市集見到呢個人自認系唐伯虎，重揸住啲字畫喺度賣，我攞返嚟畀夫人睇睇。
華夫人：(看畫)嗯?!果然系唐伯虎嘅手筆。
祝枝山：冤枉呀!我都話唔系唐伯虎咯。
華夫人：如果你唔系唐伯虎，點解有咁多佢嘅畫呢?
祝枝山：我趁唐伯虎唔喺屋企嗰陣，撻嘅啰。
華夫人：你口口聲聲話自己唔系唐伯虎，噉你系邊個呀?
祝枝山：我系江南四大才子之一祝枝山，如假包換!
華夫人：你唔肯認呀?!好，冬香，帶華安出嚟，等佢當面認下，佢不共戴天嘅仇人唐伯虎。
冬香：系，夫人。
祝枝山：華安?!
(唐伯虎以扇遮面)
唐伯虎：夫人。
華夫人：做咩呀?
唐伯虎：冇，琴日我講得嘢多，肌肉抽筋啫。
華夫人：你埋去認嚇佢，系咪你嘅仇人唐伯虎。
唐伯虎：系。
(唐伯虎走到祝枝山面前，將扇拿開，臉上貼滿了膏藥)
祝枝山：哦，原來系你!
唐伯虎：超!你噉都認得?
祝枝山：唓!你化灰都認得你啦，你就系唐……
唐伯虎： (打斷祝)冇錯!我就系唐伯虎千方百計要迫害嘅死剩種。(湊過去悄悄對祝說)嗱，唔想死好收聲嚇。夫人，因為唐伯虎佢每次行兇都蒙住面紗，所以小人都唔敢肯定佢系唔系。
華夫人：噉呀，噉就寧枉毋縱，殺咗佢啦!
唐伯虎：啊，咪住!呢個人就算唔系唐伯虎都應該同唐伯虎有莫大嘅關連，所以留返條命喺度應該有用嘅。
華夫人：嗯，死罪可免，活罪難饒。石榴，你帶佢入柴房好好看管，任你處置!
石榴姐：謝夫人賞賜!
祝枝山：喂，你想點呀?
石榴姐：帶佢入去。
祝枝山：喂喂喂，唔好搞呀，我系男仔嚟架喇。
(石榴姐心滿意足從柴房出來。唐伯虎攞住刀偷偷入柴房。)
祝枝山：啊，喂，唐兄唔系要殺人滅口嚇嘛?!
唐伯虎：收聲啦，而家我靜靜雞放你走，速勐吖。
祝枝山：喂，唔好呀，華府好食好住，況且我啱啱上咗件怨婦嘅極品，我唔舍得走呀。
唐伯虎：你唔系講笑嚇嘩?
祝枝山：真架咧!況且我喺出便爭到成身債，呢度系最好嘅避難之處啦。
唐伯虎：你--(外面腳步聲)有人!(躲到柴堆內。進來的是秋香)
秋香：你冇事吖嘛?
祝枝山：咩事呀?秋香姐。
秋香：請問，你系咪真系唐伯虎呀?
祝枝山：姑娘為何有此一問呢?
秋香：實不相瞞吖，我好傾慕唐伯虎嘅才華同文采，我好想見一見佢真人呀，你話畀我聽你系咪吖?
祝枝山：冇錯，我就系唐伯虎。
(唐伯虎一驚，發出聲音)
秋香：啊?!點解有聲嘅?
祝枝山：畜生嚟嘅啫。
(唐伯虎又驚叫一聲，秋香聽到都嚇到驚叫一聲)
祝枝山：畜生咪嘈!秋香姐，今日我有緣相會，應該可以促膝長談。(拉秋香的手，秋香害羞閃開)
秋香：唐公子，我可唔可以問你一個問題呀?
祝枝山：當然可以。不過為咗表達你嘅誠意，你先答我一個問題。
秋香：嗯。
祝枝山：首先，咪埋雙眼，全身放松，慢慢將你嘅頭放喺我左肩膊上。
秋香：嗯?!
祝枝山：哎，唔好緊張，你唔相信我咩?盡量唔好緊張，慢慢將個面挨埋嚟……啱嘞!乖嚇!
唐伯虎：忍無可忍!
石榴姐：靚仔!我嚟嘞!
秋香：有人呀!(也躲到柴堆中后)
(石榴姐奇裝異服，大跳艷舞)
祝枝山：小姐，邊位?
石榴姐：咩呀?噍完家嚇想扮唔認得噉話啰 ?嚇?!
祝枝山：我唐伯虎一介斯文人，你講乜嘢?
石榴姐：妖!你正話扯到咁盡，嚇?
祝枝山：喂，頭先冇人就扯到盡啫，而家有……(突然意識到自己說漏嘴了)
石榴姐：有咩啫?呢一劑要同你玩返一鋪，美女與野獸!
秋香：原來唐伯虎系個噉嘅人，華安都比佢好得多!
唐伯虎：(突然出現)過獎嘞秋香姐。
秋香：啊?!你點會喺度架?
唐伯虎：我?我嚟(目及)嘢嘅啫，你呢?
秋香：我都系呀。
唐伯虎：哦。噉一齊吖。
(祝枝山和石榴姐嗯啊聲不絕)
唐伯虎：嘩，呢招精彩呀!
秋香：睇睇?
祝枝山：哇!老虎唔發威，你當我冇到?
石榴姐：醒多劑吖!
祝枝山：多多都有呀!
(寧王帶大批人馬來到華府)
武狀元：太師，寧王帶住大隊人馬入緊嚟呀!
華夫人：老爺，呢個寧王一向同老爺政見不合，喺朝廷大家都水火不容，今日貿然到府，重帶咗咁多官兵，恐防另有所謀，我哋因住佢借啲意發爛 !
下人：寧王到!
寧王：哈哈~~~~~~~~~~~~華太師你好嘛?
華太師：哈哈~~~~~~~皇爺遠道光臨寒舍，我真系受寵若驚嘞。
寧王：噯，太師言重喇!我素聞太師你對丹青有所偏好，我非常辛苦先至揾到唐伯虎嘅幾張真跡專程送畀你呀。
華太師：王爺……
寧王：唔使羅嗦，師爺，攞畫嚟。
師爺：系。
華太師：啊，果然栩栩如生，活靈活現 。
寧王：哈哈，系唔系呀?!我最喜歡佢有王者風范，我揾人重新裝裱架。你睇，嗰種令群鳥低頭嘅氣勢，躍然于紙上，真系不愧鳥中之王呀!哈哈~~~~~~~~~~
華太師：嘿嘿，王爺，咁貴重嘅禮物，我點受得起呀?
寧王：嗯?!噉即系唔畀面啫，系咪想迫我發爛渣?!
華夫人：哎，王爺息怒，既然王爺今日有圖而來，賤妾都好想開嚇眼界。
寧王：好!既然華夫人都系愛畫之人，大家一齊研究嚇!
華夫人：秋香，你都嚟睇嚇。
秋香：系，夫人。(看畫)呢幅孔雀圖，論畫本身的確系唐寅少有嘅妙筆之作，可惜孔雀始終系凡鳥，就算重新裝裱嚟襯托，亦都系無補于事。凡鳥就系凡鳥，斷唔會飛上枝頭變鳳凰嘅!
華夫人：王爺，賤妾管教無方，如果秋香講得有咩唔啱嘅，請王爺恕罪。
師爺：哼!王爺，夫人噉講，佢哋一定收藏咗比我哋呢幅更好嘅唐寅作品!
寧王：系 !夫人，噉就要攞出嚟畀我見識見識嘞!
華夫人：實不相瞞，我哋真系冇唐伯虎嘅畫。
師爺：(指著華太師)豈有此理!你即系存心戲弄王爺!
寧王：華太師!
華夫人：哎，王爺，畫就冇嘞，不過唐伯虎本人呢，正在喺舍下做客。秋香，去請唐伯虎出嚟。
秋香：系，夫人。
秋香：(將祝枝山帶到)夫人，唐伯虎到。
華夫人：唐伯虎，我要你即即揮毫，畫一幅鳳凰傲意圖畀王爺欣賞嚇。
寧王：好!我要睇嚇你點樣畫神鳥鳳凰，好過我幅孔雀!如果你畫得唔好，你小命不保呀!
華夫人：唐伯虎，你重唔快啲畫?!
祝枝山：啊啊呀呀~~~~~~~~~~~(揮筆幾下畫好)大功告成!(太師、寧王等人圍上觀看)嗱，呢只神鳥鳳凰呀!
參謀將軍：唔系嚇嘩?!分明就系雞仔啄米圖呀真。
祝枝山：啊~~~~~，爭少少。(又在那張奇丑的小雞頭上加了個圈)喺個頭度加個光圈，嘻嘻，噉咪神鳥啰!
寧王：豈有此理，居然敢戲弄本王!
華夫人：(用桌子將祝枝山打倒在地，口吐白沫，不省人事)多謝王爺，我一直懷疑呢個人系假架，今乜喺王爺威嚴之下，果然露出馬腳?抬佢出去!
下人：系!
寧 王：素聞太師才高八斗，我有一個參謀將軍想同你切磋切磋喎!
華夫人：我哋老爺點可以以大欺小呢?
華太師：系咯，系咯!
參謀：文學切磋嘅嘢冇分輩份嘅!
寧王：系咯，玩嚇啫!不過如果你對唔到嘅，唔好怪我發爛渣喎!出對!
參謀：一鄉二里共三夫子不識四書五經六義竟敢教七八九子十分大膽!
寧王：對啦，做咩唔對呀，咁唔畀面?我真系發爛渣架喇!
唐伯虎：畀我試嚇咧!
唐伯虎：十室九貧湊得八兩七錢六分五毫四厘由且三心兩意一等下流!
參謀：好工整 !
華太師：哈哈哈，華安，你真系嚟得好及時呀!
唐伯虎：冇事，冇事!
寧王：嗯!
參謀：在下七省文狀元兼參謀將軍，綽號“對王之王”嘅對穿祥，未請教?
唐伯虎：細佬讀過兩年書，塵世中一件迷途小書僮，華安!
參謀：好，等我嚟會一會你!(兩人對立許久，相互一個飛吻，眾人皆倒)
唐伯虎：對唔住，我哋大家惺惺相惜，情不自禁啫。
參謀：言歸正傳，我哋開始嘞!
參謀：畫圖里，龍不吟虎不嘯，小小書僮可笑可笑!
唐伯虎：棋盤內，車無輪馬無韁，叫聲將軍提防提防!
眾人：好!好嘢!好嘢!
參謀：鶯鶯燕燕翠翠紅紅處處融融洽洽!
唐伯虎：雨雨風風花花葉葉年年暮暮朝朝!
華太師：華安真系叻仔，叻仔!
寧王：快啲出對冧佢!對呀!對呀!
參謀：十口心思，思君思國思社稷!
唐伯虎：八目尚賞，賞花賞月賞秋香!
(眾人鼓掌)
參謀：我上等威風，顯現一身虎膽。
唐伯虎：你下流賤格，露出半個。
參謀：我堂堂參謀將軍會輸畀你個書僮?
參謀：冚家鏟泥齊種樹!
唐伯虎：汝家池塘多交魚!
參謀：魚肥果熟嫲捻飯!
唐伯虎：你老母兮親下廚!
參謀：啊?!(參謀將軍后退數步，口吐鮮血)
唐伯虎：對對就本為消閑作樂，今日穿祥兄竟然對對到嘔十九幾兩血，可謂曠古爍今，小弟拜服拜服!
華太師：哈哈~~~~華安，呢度冇你嘅事喇，你快啲出返去掃地啦!
唐伯虎：遵命!
華太師：哎，王爺，今日我呢個小小書僮多多冒犯，令到您發唔到爛渣添。哎呀，真系對唔住嘞!
寧王：好，(吩咐師爺，原來師爺就是奪命書生)奪命書生，快啲攞皇上御賜嘅《春樹秋霜圖》畀太師睇嚇。
奪命書生：系!一齊欣賞欣賞!太師，請接畫!
華夫人：小心!(將畫接住) 噉睇唔方便，不如過嗰邊睇咧!
(兩人打斗)
夫人：咁名貴嘅畫，都系收好佢好啲!
奪命書生：華夫人，咁快睇完啦?大把時間!
(又打!直打到桌子底下)
夏香：死嘞，夫人唔知有冇危險呢?秋香姐，我哋去睇嚇咯!
秋香：(點頭)好呀!(四香伸頭到桌底下觀看，結果都被打出來)
武狀元：啊?!
唐伯虎：(又趕到)咩事鬼殺咁嘈呀?
武狀元：唔話你知!
唐伯虎：秋香姐!
(四香被打得面目全非)
春香：我畀人踢咗三腳呀!
武狀元：哎?!歪曬嘅?!
夏香：我畀人踢咗八腳啊!
石榴姐：(仰天長笑)啊哈哈~~~~~~~~~終于有人丑過我喇!哈哈哈~~~~~~~~
唐伯虎：秋香姐，究竟發生咩事呀?
秋香：(被打得像豬頭)我中咗三十幾腳!
唐伯虎：鬼吖——!
(唐伯虎雙腳將秋香又踢到桌子下面，“鬼啊”奪命書生和華夫人驚得從桌下鉆出，兩人衣服換了過來)
寧王：嚇?!
武狀元：嗰個真系秋香嚟架!
石榴姐：系呀!佢系畀人打成噉架!
唐伯虎：咩話?!唔通系中咗武林中至惡毒嘅……
奪命書生：冇錯!系至卑鄙至惡毒嘅“面目全非腳”。唓!爭啲唔記得自己踢嘅，以為撞鬼添!
唐伯虎：啊?!秋香!
(將秋香從桌下拖出，一陣猛打，秋香又變成了人樣)
秋香：我頭先做咩呀?
唐伯虎：你正話中咗至惡毒嘅“面目全非腳”，處境好危險呀!好彩我及時用失傳咗嘅絕學“還原靚靚拳”，幫你打回原形，你而家冇事嘞!
秋香：多謝你，華安!
唐伯虎：唔好客氣啦!
秋香：我系咪還原曬嘞?
唐伯虎：哎，下巴好似重爭少少喎。
秋香：噉你大力啲吖!
唐伯虎：aza!
華太師：嚇?秋香，你重靚咗 !
(華夫人與書生再斗，夫人受傷，華安上去擋住，打斗中將畫撕碎)
寧王：華太師，我一片好心攞幅畫畀你欣賞，你不領情不得止，重撕爛佢?!
華太師：王爺息怒，華安唔系有心架。
寧王：你唔使多講，你毀壞國寶，我聽日告上皇上，我睇你今次重唔滿門抄斬!
唐伯虎：等等。
寧王：嗯?!
唐伯虎：王爺正話嗰幅《春樹秋霜圖》，我睇恐怕唔系唐伯虎嘅真跡嚟 !
寧王：大膽小書僮，你玩我呀?!皇上御賜畀我嘅名畫，又點會系假架?!人嚟，發爛渣!
唐伯虎：咪住!其實真正嘅《春樹秋霜圖》不嬲都藏喺華府里頭架!hai!唔信嘅話我即刻攞出嚟畀你睇!(拉秋香)秋香，跟我嚟!
奪命書生：王爺!
寧王：哼!好，我睇你攞啲咩出嚟!然后先將你哋冚家富貴!
(書房內)
秋香：華安呀，你搞乜鬼呀?!華府點會有唐伯虎家《春樹秋霜圖》啫?!你話而家點算好嘞?
唐伯虎：秋香姐，麻煩你幫我磨墨吖。
秋香：哎，而家冇辦法嘞。噉吖，快啲幫我磨墨吖。
唐伯虎：嚇?
秋香：嚇咩啫!快啲幫我磨墨啦。我唯有憑自己嘅記憶去畫，但唐伯虎嘅畫意境咁高，我點模仿得到啫?只希望寧王佢唔識貨，可以瞞天過海啦!冇可能嘅，寧王又點會唔識唐伯虎嘅畫先得架?!華安呀，呢次闖咗大禍嘞，自己性命難保，亦都會連累華府架，噉而家點算好呢?你都系走罷啦!(開門準備讓唐伯虎走)冇人呀，你快脆啲走呀。(回頭看見唐伯虎己畫好了畫)
秋香：(驚)你畫架?
唐伯虎：系，有個時期我系靠畫唐寅嘅假畫為生。呢幅《春樹秋霜圖》我畫過百九幾次，熟曬架嘞，希望可以過到骨啦。
(秋香看到唐伯虎的印章，很驚訝)
唐伯虎：哦，呢啲揾食架撐梗系要隨身攜帶啦。
秋香：但系，你點會畫得咁快嘅?!
唐伯虎：哎，今次算慢架喇!
(回到客廳)
唐伯虎：呢幅先至系唐伯虎嘅真跡呀，王爺。
寧王：你話真跡就真跡架喇?!有咩證據呀?
唐伯虎：唔啱王爺揾個專門人才嚟驗驗至講咧!
寧王：對穿祥!(對穿祥還在嘔血)嘿，未死嚇嘛?!未死就過嚟驗嚇幅畫，嚟!
對穿腸：哦哦哦!
華太師：(問唐伯虎)得唔得架?
唐伯虎：搏一搏吖。
寧王：哼哼哼(對腸穿驗畫，王爺得意的笑)。
對穿腸：王爺呀，呢幅真系唐寅嘅手筆 !
寧王：嚇?!你有冇眼花呀?冇可能嘅!睇真啲!睇真啲!
對穿腸：的確系真架!不過啲墨跡好似未干噉嘅!
唐伯虎：近排回南天時，濕氣重啫。
華太師：系，濕氣重呀。
寧王：(氣憤的將對穿腸打倒)死啦!
唐伯虎：王爺亦都太唔小心嘞，皇上御賜嘅畫都會畀人調換，若然驚動到皇上，恐怕系死罪!
寧王：啊?!
華太師：不過，念在大家朋友一場，呢幅畫就送咗畀你啦，以后啊要小心保管呀，唔系呀又畀被人調換呀!
(寧王欲動，被奪命書生勸住)
奪命書生：(對寧王耳語)王爺，今日有高人喺度，不宜久留呀。
寧王：好!我哋走!
華太師：哎，咪住!
寧王：啊?!
華太師：王爺，你咪話咗要發爛渣嘅?!唔記得咗喇?!
寧王：(惱羞成怒)好!(在客廳地上撒了一泡尿，眾人瞠目)哼!問你怕未?哼!
(寧王人等出了華府，門口)
寧王：頭先你做咩唔大開殺戒呀?
奪命書生：王爺，頭先嘅書僮唔簡單架，我差啲呀領嘢。
寧王：你有冇搞錯呀?你又話書生奪命劍，威力無窮，天下第一嘅?而家小小一個書僮就畏首畏尾?!哎!
奪命書生：王爺，就系因為書生奪命劍威力驚人，小人恐防誤傷王爺家嘛。
寧王：(上馬)我今次呀畀你丟曬架嘞，走!(大隊人馬離開)
奪命書生：王爺，小人以性命擔保，三日之內，等我回復元氣之后，同你發佢爛渣，攞太師人頭返嚟!
寧王：系呀，重有嗰個華夫人，嗨，重有個書僮，嗨，重有個秋香，嘿，橫掂都系嘞，嚟個冚家富貴吖!
奪命書生：系!小人遵命!
(公子書房，兩公子在侍候唐伯虎)
華武：大佬啊，舒唔舒服呀?
唐伯虎：幾好吖。
華文：大佬呀，我收到風你尋日有一招“還原靚靚拳”，技驚四座，可唔可以幫我哋個樣“扌耷”返靚啲呀?
華武：系咯系咯!
唐伯虎： 兩位已經貌若天仙，都唔使再“扌耷”嘞啩?
華武：嘿嘿嘿，靚邊度有人嫌多架，大佬?
唐伯虎：唔該幫我斟杯茶先再講啦。
華武：(拍桌而起)有冇搞錯呀?你講唔該。服侍大佬系天經地義家嘛，你有咩理由講唔該吖!
華文：講唔該即系唔當我哋系僆啫，你令到我哋會好失望，而導致內分泌失調，大小便失禁，話唔定攋涿屎落你個頭，就大家都唔好啦!
唐伯虎：喂，我講聲唔該啫，唔使攋屎咁大鑊嚇嘩?
華武：你咪笑呀!
華文：玩呀?而家講真架!
唐伯虎：明白。你兩條廢柴躝過去攞杯茶過嚟!
華文：系咯，噉先系架大佬。
華武：多謝大佬。
(華文、武剛要開門，正好華夫人和秋香進來)
華文、武：娘親!
華夫人：做咩呀?去邊呀?
華文、武：去斟茶啰!
華夫人：你哋出去先，我有嘢要同華安講嘅。
華文、武：哦。
華夫人：坐吖。
唐伯虎：夫人請。
華夫人：華安呀，你立咗大功，呢度有一杯千年人參茶，好有益架，飲咗佢啦。
秋香：(遞茶)華安。
唐伯虎：唔該曬，秋香姐。
秋香：唔使客氣，趁熱飲啦。
(唐伯虎將茶喝下)
華夫人：以你咁好嘅才華，應該考取個功名至啱架。點解會喺我哋華府做下人呢?
唐伯虎： 夫人，功名于我如浮云，在下一啲都唔稀罕。況且呢度有夫人同埋秋香姐對我咁好，我留喺度做死一世都抵吖!
華夫人：(起身，笑)好一個風流才子……唐伯虎呀?
唐伯虎：啊哈哈~~~~~~夫人唔系同我講緊嘢吖嘛?
華夫人：重詐諦?!憑你高強嘅武藝，詩畫嘅才華，都估到八九成啦。(坐到唐伯虎身邊)我同唐家雖然有仇，不過尋日你舍身相救，夫人假假地德高望重，斷唔會恩將仇報嘅，系咪認咗佢啰。
唐伯虎：莫講我唔系吖，就算我認話系，夫人你到時反口，我都吹你唔脹亦掹你唔長，你即系明唔明我講咩呀你?
華夫人：我明，我明。不過今日唔認總有一日要認架?
唐伯虎：噉聽日先。
華夫人：咁竄?
唐伯虎：系吖!
華夫人：好，我重諗住，如果你認呢就將秋香許配畀你添。
秋香：夫人……
唐伯虎：系咪呀?!講過嘢冇得唔算數架!冇錯!我就系美貌與智慧并重，英雄同俠義嘅化身唐伯虎!
(秋香一驚，杯子摔碎在地上，門外眾家丁將唐伯虎團團圍住)
秋香：夫人--
華夫人：多事!
唐伯虎：夫人你--!
華夫人：冇錯，系我反口啊!對于你呢種人我宜得你快啲死呀!
(眾家丁欲擒唐伯虎)
唐伯虎：噓……夫人，有事慢慢講，何必動刀槍呢?
華夫人：哼，你而家求我咧咩?哈哈哈~~~唐天豪，你呢個負心人，當日我殺你唔死，今日我就要殺咗你個仔，都可以泄我心頭之恨!
唐伯虎：哈哈哈~~~~唔好怪我坦白，就憑你一件番薯幾件蛋散就想攞我唐伯虎嘅命，會唔會[開玩笑](國語)咗少少?
華夫人：哈哈~~~~我話畀你知，頭先你飲嗰啲參茶，我已經落咗天下第一奇毒“一—日—冚—包—散”!
唐伯虎：哈哈~~~~天下第一奇毒，幾時輪到你哋“一日冚包散”?!應該系我哋唐家嘅“含笑半步釘”至啱!
華夫人：哈哈~~~~廢話!我哋“一日冚包散”系用七種唔同嘅毒蟲，再加埋鶴頂紅，提煉七七四十九日而成，無色無味，殺人于無影無蹤。
唐伯虎：哼，我哋“含笑半步釘”系用蜂蜜，川貝，桔梗，加上天山雪蓮配制而成，無須冷藏，亦不含防腐劑，除咗毒性猛烈之外，味道重好好添。
(兩人面對鏡頭，響起諧趣音樂，成廣告模式)
華夫人：食咗“一日冚包散”嘅人，一日之內會武功全失，經脈逆流，胡思亂想，以至走火入魔，最后會冚包散曬而死嘅。
唐伯虎：冇錯嘞!而食咗“含笑半步釘”嘅朋友，顧名思義，系不能行前半步，或者面露笑容，否則亦會全身爆炸而死。實在系居家旅行--
華夫人：殺人滅口--
兩人：(齊聲)必備良藥!
武狀元：系呢，唔知喺邊度可以買到呢嚇?
唐伯虎：嚇!呢位老細你有運喇，我呢度啱啱就有一粒。
華夫人：(搶過藥丸)哼，呢粒爛藥勁得過我嗰粒?!
唐伯虎：失禮，普天之下我粒最勁!
華夫人：講嘢呀，講到會轉彎都得架啦!
唐伯虎：唔信呀?夠膽啪一粒試嚇!
華夫人：你睇死我唔敢啪嚇嘩?!
唐伯虎：就系睇死你唔敢啪!
華夫人：我就啪畀你睇!
唐伯虎：啪!
華夫人：啪咪啪啰!
唐伯虎：啪!
華夫人：哎，你個死仔吖睇死我!
唐伯虎：夠羌(姜)你就啪!唔好講咁多嘢呀。嚟吖!嚟吖!
(斗嘴)
華夫人：啪!(將藥丸放在嘴邊，停住)你當我白癡呀，戇居呀?!啪?!哈哈~~~~~ (嘴張老大，被唐伯虎將藥丸拍進肚內)
唐伯虎：你唔戇居!系笨實啲啫!家嚇大家都中咗毒嘅時間，不如攞解藥出嚟交換當冇數咧?
華夫人：你個仆街仔吖，你拋我呀?
唐伯虎：夫人，搏唔過呀，你條命咁矜貴。
唐伯虎：人嚟!帶佢入去柴房，鎖喺度等死!
下人：系!
秋香：夫人，請你手下留情呀，何必兩敗俱傷?!
華夫人：唔使講嘞!唓，區區“含笑半步釘”難得到我咩?最多唔笑唔行啫。(雙腳蹦著走，絆在門檻上，摔倒)哎呀!
(秋香偷偷來到柴房)
唐伯虎：秋香?!
秋香：唔好嘈呀!我喺夫人嘅練功房嗰度偷咗好多藥出嚟呀，你睇嚇邊一種可以解到你啲毒吖。
唐伯虎：要你冒啲噉嘅危險，華安真系過意不去。
秋香：重話自己系華安呀?!其實嗰次你畫《春樹秋霜圖》嗰一陣，我已經知你系唐伯虎嘞。但我估唔到你夠膽喺夫人面前承認自己嘅身份。
唐伯虎：秋香，其實我做所有嘢，完全都系為咗--
秋香：哎，我有個問題想問咗你好耐架嘞，你可唔可以答我呀?
唐伯虎：咩呢?
秋香：唐伯虎系咪你花名嚟架?
唐伯虎：唔系花名，點解噉問?
秋香：伯虎……白虎，哎，點解你阿媽幫你改個咁戇居嘅名嘅?
(唐伯虎沉思)
秋香：哎，你唔想答冇勉強 。
唐伯虎：多謝。
秋香：噉你鐘意啲咩顏色呀?
唐伯虎：都好多架 ……譬如黃色吖。
秋香：(指自己的衣服)黃色?呢只黃色呀?
唐伯虎：系呀!
秋香：噉唔怪之得你成日都跟住我啦!
秋香：哎，你平時除咗畫畫之外，重有啲嗜好呀?
唐伯虎：嗯，都冇乜特別嘅，都系睇嚇書呀，聽嚇音樂，吹嚇簫呀噉。
秋香：你會吹簫?!
唐伯虎：系呀!
秋香：你會吹簫咁厲害架!
唐伯虎：哈哈~~~~得閑教你吖。
秋香：好呀!(坐在唐伯虎身邊)你身為江南四大才子之首，會唔會有好大壓力呢?
唐伯虎：哦，呢條問題問得好!壓力呢，講真都相當大。所以我一得閑呢都成日去旅行，減減壓，噉你明唔明?
秋香：哦，我明我明。“含笑半步釘”呢只毒藥系咪你發明架?
唐伯虎：邊有呢只毒藥架，我老作嘅之嘛。
秋香：你咁抵死。嘩，你揾咗咁耐揾到解藥未啫?
唐伯虎：(笑)冇樽系呀。哈哈……
秋香：嚇~~~咁唔好彩呀?!
秋香：我想問嚇你呀，其實你怕唔怕鬼架……
華夫人：唐伯虎，真系可惡!白白累我跳足幾日。
秋香：夫人，既然你都冇中毒，不如大事化小，放咗唐伯虎啦。
華夫人：秋香，我念在你系我最寵愛嘅丫鬟，如果換咗第二個我一早將你趕出華府嘞，以后都唔準在我面前提唐伯虎!
秋香：夫人。
華夫人：即刻躝出去!
秋香：(跪在夫人面前)秋香跟隨夫人多年，夫人對我恩重如山，今生今世報答不盡，秋香今日不孝，大膽請夫人放過唐伯虎一命，秋香愿替唐伯虎受罪，任由夫人處置。
華夫人：(大怒)秋香，你大膽呀!
三香：秋香姐，起身啦……
秋香：如果夫人唔答應，我系唔會起身。
三香：夫人……
華夫人：我決定咗嘅嘢，系唔會改變嘅!
三香：(也都跪下)夫人……
華夫人：做咩呀?一個二個做咩呀?
冬香：夫人，我哋同秋香姐情同姐妹，求你網開一面，答應秋香姐啦。
秋香：冬香。
春香、夏香：夫人，求嚇你吖。
華夫人：噉即系算咩呀?!人嚟，拉佢哋出去!
三香：夫人!
華夫人：武狀元，你死咗去邊呀?
(突然武狀元和許多下人摔了進來，原來是奪命書生大開殺戒)
華夫人：大膽奪命書生，夠膽喺度搗亂!
奪命書生：華太師居然夠膽得罪我哋王爺，上次你大命，今日我要將你華府殺個雞犬不寧!
華夫人：華府唔到你喺度放肆!
(兩人大戰，華夫人受傷)
秋香：冬香，快啲通知太師呀!
(秋香趕到柴房)
秋香：(解開唐伯虎)快點走!
唐伯虎：做咩呀?
秋香：跟我嚟。(拉唐伯虎到后門)
唐伯虎：發生咩事啫?嚇?
秋香：奪命書生大開殺戒!
唐伯虎：奪命書生?!
秋香：出便好危險，你快啲走啦!
唐伯虎：噉你呢?
秋香：唔好理我，走啦!(將唐伯虎推出門外，關上門)
唐伯虎：秋香!
秋香：夫人待我恩重如山，就算發生咩事我都要跟住夫人架。
唐伯虎：你開門先喇。
秋香：華安!我愛你!
唐伯虎：你講咩話?!秋香!秋香!
(華府內，華夫人大戰奪命書生)
華太師：快啲保護夫人走啦。(家丁四散)你哋走去邊呀?(秋香走來)秋香，快啲叫華安嚟幫手啦，只有佢先可以頂得住架咋。
秋香：華安已經走咗嘞。
華太師：嚇，華安咁冇義氣?
華文：阿爹，娘親都走，我哋都較咯。
華太師：哦。
(華夫人被打倒在地)
眾人：夫人!
華太師：你點呀?
(秋香在關鍵時刻挺身而出，護在華夫人身前)
秋香：夫人!
(華府內，華夫人大敗。在奪命書生的劍就快觸到秋香的喉嚨的一瞬間，唐伯虎趕到，將劍架開)
眾人：華安!
華夫人：華咩安吖，系唐伯虎啊。小心呀你，你嘅毒未解架!
唐伯虎：放心，解藥我已經喺練功房度揾到。我重趁住有少少時間，沖咗個涼，換埋套衫添。
唐伯虎：奪命書生，當年你用計打贏我阿爹，唔知而家可唔可以打贏埋我呢?
奪命書生：哦!原來你就系嗰個死剩種!唔難之得咁熟口面啦!
唐伯虎：今日我就要為先父報仇，我哋唐家霸王槍要重奪兵器譜上嘅排名!
大話周 星馳站 zhouxingchi.cn
(一番惡斗)
唐伯虎：回馬槍!
(槍頭被奪命書生打掉，槍柄插在奪命書生胸口)
奪命書生：哈哈哈，你老竇戇居，你重戇居，明知冇咗槍頭，你重要厾!嚇?
唐伯虎：邊個話冇槍頭唔厾得架?!
(原來槍柄己刺穿奪命書生的胸膛)
唐伯虎：我呢招已經練到唔使槍頭都厾得入，抵輸吖僆仔!
(奪命書生倒地身亡)
唐伯虎：從今開始，我哋唐家霸王槍重奪兵器譜排名第一位!
秋香：華安，你冇事吖嘛?
唐伯虎：我冇事，你呢?
華太師：嗨，太好嘞!你及時出現真系令我太感動嘞!唐伯虎，你救咗我哋華府上下，我都唔知點報答你至好呀!
唐伯虎：太師無需客氣，我只系有一個要求……
華夫人：你唔使多講喇，你鐘意秋香吖嘛?!我就將佢許配畀你喇。
唐伯虎：(跳起)好嘢!
(婚禮大堂，二十個新娘蓋著紅蓋頭)
唐伯虎：哇嗨!乜咁多新娘響處嘅?
華夫人：唐伯虎，我雖然應承將秋香許配畀你，不過有條件，睇嚇你嘅造化啦。你可唔可以喺二十個新娘里頭選中秋香?華文!
華文：(讀條款)點選時間以一柱香為限，即時生效。(武狀元點香)點選規則如下：
一、點選人不準超越黃線觀察新娘。
二、所有準新娘不準發出任何聲音，違例者當棄權論。
三、不準使用任何物件接觸準新娘之身體或衣物。
欽此!
華夫人：如果喺時限之內，你唔能夠點中秋香嘅話，噉你就輸咗，噉秋香就歸我兩個仔華文、華武所有。
華文：大佬，我哋執死雞咋!
華武：唔好見怪呀!
唐伯虎：夫人，日光日白，好心玩少我一陣啦。
華夫人：唐公子，何出此言呀?
唐伯虎：喺啲噉嘅規則底下，我有乜可能點中秋香?我唐某本住天地良心，對秋香系一往情深，義無反悔，點解系都要一而再，再而三噉為難我?
華夫人：唐伯虎，你唔好唔記得，當初系你話家境清貧，甘愿到我哋華府為奴為仆。嗱，重有契約為憑，但系，你實在系為咗溝女!似乎系你玩我哋在先 !
唐伯虎：邊個話?份契約嘅第一行頭四個字唔該你打橫睇睇。
(原來是“我為秋香”)
華夫人：我為秋香?!
唐伯虎：冇錯!我為秋香!我一早已經表明來意，系你哋未夠班睇唔出啫!
華夫人：你唔好讕醒，你捉我字虱之嘛，我系要玩死你!
唐伯虎：想玩我，讀多兩年書先啦!我而家就系要帶秋香走，睇嚇你哋有冇人攔得住我!
華夫人：試嚇!呢度華府你敢亂嚟?!我叫太師稟告皇上，一于將你全家冚家鏟!
唐伯虎：嚇，你個八婆，背信棄義，卑鄙無恥!
華夫人：鬧我八婆?!死啦!(扔東西)
唐伯虎：仆街吖!(扔回去)
華夫人：哎呀~~~~~~~我頂你個肺吖!
唐伯虎：嚟吖!
華夫人：唔好拉住我。
唐伯虎：打鑊你呀，契弟!
華夫人：死啦。
(兩人欲撕打，被旁人拉開)
華太師：停手!停手!唐伯虎，秋香始終系我哋華家嘅人，你想娶秋香做老婆系要依返我哋華府嘅規矩架噃!嗱，嗰炷香呢就嚟燒完嘞，你快啲諗返個好橋罷啦。
唐伯虎：好!我唐某今日就使出生平所學，誓要點到秋香為止!
(兵來將擋)
唐伯虎：氣吞天下!
華夫人：無風起浪!
唐伯虎：如來神掌第一式--隔山打牛!
華夫人：移花接木!
唐伯虎：打孖嚟!
華夫人：我頂!(唐伯虎中招)
華太師：唐伯虎，你唔死得吖嘛?
華夫人：如來神掌?!掛臘腸就真!
唐伯虎：系你逼我出絕招嘅!(運氣)龜--波--
華夫人：好強嘅氣呀!
唐伯虎：氣--
華文：佢嘅戰斗數值竟然去到百九幾萬!
華武：唔通系超級薩亞人?
唐伯虎：功!
(氣發出，眾新娘均被頂飛，蓋頭紛紛落下。卻有一半左右的新娘還帶著面具)
唐伯虎：咩話?!
華夫人：哈哈~~~~~~~點呀，唐伯虎，你有張良計，我有過墻梯呀!
唐伯虎：你老母你出術陰我!
華夫人：你老竇我系陰你呀，你吹咩?(做鬼臉)
唐伯虎：小喇叭，打鑊你呀……(欲上前，被攔住)
華夫人：支香熄咁滯喇，指定秋香嫁畀我兩個仔啦!
唐伯虎：啊?唔通我唐某真系注定要孤獨一世?天呀!別人笑我太瘋癲，我笑他人看不穿，不見五陵豪杰墓，無花無酒鋤作田。
(一準新娘身子動了動)
唐伯虎：我知嘞!(飛身將準新娘抱起，飛到房上吊燈上)
華文：(香滅)時間到嘞!
唐伯虎：啱啱好呀!秋香!(掀開準新娘的面具，竟然是石榴姐!)
唐伯虎：大佬呀，我有我念詩啫，你作乜叉嘢反應呀?
石榴姐：我冇做反應呀，我急尿打尿陣之嘛!
唐伯虎：有冇刀仔響身?
石榴姐：做咩呀?
唐伯虎：想自殺。
石榴姐：唔好呀，系都同我洞埋房先啦!
唐伯虎：(翻身讓自己落下)畀我死咗佢呀!
武狀元：(將唐伯虎接住)僆仔，連我條女石榴你都敢掂?!你條女喺嗰邊呀!
(秋香由一婢女背著，慢慢出現)
武狀元：哎，快啲去拜堂啦。
(眾人鼓掌。鞭炮響起。彩禮抬到。)
武狀元：嚟嚟，執正啲，執正啲，噉先似樣家嘛!嚇。
媒婆：拜堂喇。跪低啦。坐喺度啦，開始拜堂架喇。
(兩從跪下)
華夫人：秋香，唐伯虎通過咗咁多重考驗，我相信佢系真心愛你，我而家將你許配畀佢。
秋香：多謝夫人!
華太師：唐伯虎，你好滿意啦!重有咩要講呀?
唐伯虎： 人生大起大跌得太快，實在太刺激嘞，搞到我有少少急尿添。
華太師：急尿就未必，心急洞房之啩?哈哈哈。
華夫人：唐伯虎，唔好枉費我哋一番心意，以后要好好地對秋香呀。
唐伯虎：夫人，我重爭啲怪錯咗你添!
華文：一日大佬，一世都系大佬，我祝你哋年年有今日……
華武：歲歲有今朝!
唐伯虎：多謝你哋!
(唐伯虎與秋香含情相望)
唐伯虎：秋香，真系幾經波折啊呵，好在……
秋香：終于有情人終成眷屬。
唐伯虎(深情地)：嗯。
武狀元：呵呵，恭喜恭喜……
華太師：喂，唐伯虎，你老婆紅唇欲滴，面泛桃花，重唔即刻啜啖先?!
唐伯虎(欲親)：嚟呀嚟呀……
秋香：咪住!猜返板先咧!
唐伯虎：嚇?!
秋香：噉都唔識?!噉麻將，天九，骰子花燈十五胡都是但識飯啩?
(唐伯虎倒!)
(全劇完)
【看粵語劇本唐伯虎點秋香學粵語】相關文章：
從零開始學粵語02-02
粵語學習之香港粵語的特點11-07
粵語俗語語錄精選06-19
粵語必學方法08-13
粵語韻母的發音09-22
粵語的發音方法06-18
粵語日常對話08-13
有趣的粵語構詞特點11-18
ABB格式的粵語詞06-09